SIRI ZA KUISHI MAISHA YENYE FURAHA......

Kuna wakati unaona maisha yako hayana maana au umechoshwa na maisha, hivi ndivyo tulivyo licha ya kuwa maisha ni yaleyale. Kwa bahati nzuri tunawezabadilika kwa jinsi tunavyoona maisha yetu yalivyo na kwa namna tunavyotaka yawe. Ulishawahi kusikia watu wakisema “maisha yapo tu, ni wewe mwenyewe na maisha yako.’’ 

Furaha hutegemea sana wewe mwenyewe kuliko vichocheo vingine vya nje vya kimazingira. Ninamaana licha ya kuwa unaona maisha ni magumu huna sababu ya kucheka au kufurahi lakini hizo zote ni sababu unazoziona wewe mwenyewe, ningependa kukuona leo mwenye matumaini na faraja na maisha yako. Huna sababu ya kununa au kuwa mnyonge kwasababu hata ukiwa huna furaha hutatua chochote, ni heri kuwa na matumaini na maisha yako na kutafuta ufumbuzi wa matatizo uliyonayo kwani hiyo ndiyo njia ya kuondekana na maswahibu uliyonayo.

Haya ni mambo kadhaa ambayo yatakusaidia kuwa mwenye furaha na maisha yako licha ya maudhi unayopata kwa watu tunaoishi na kufanya nao mambo mbalimbali ya kila siku.

 

1. Samehe watu waliokukosea.

-Jua ya kwamba hakuna mtu aliyekamilika, mtu anaweza kukufanyia kitu kibaya ama kwa makusudi au bahati mbaya lakini yote atakuwa amekukosea. Kukaa au kuishi na kisirani kwasababu ya mtu au watu waliokufanyia ubaya kwa muda mrefu kutakuletea matatizo ya kiafya ( depression ) au kuharibu kabisa uhusiano wako na watu uliogombana nao. Kuwa msahaulifu wa maudhi unayopata kwa watu, waelewe na ikiwezekana waepuke lakini usiwe na kisirani nao.

2. Kuwa mkarimu kwa watu wote.

-Ukiwa mkarimu kuna baadhi ya watu watakusema vibaya ili mradi tu watu wengine wakuone mbaya, mchoyo au mtu wa kujigamba. Ni vyema ujue sio wote watakaona wema wako, hivyo usitegemee shukrani sana. Kuna msemo wa kiswahili ‘’unasema tenda wema na uende zako’’ nina maana ya usitegemee ahsante kupita kiasi kutoka kwa watu. Hii itakusaidia kutojali na kuumia sana pale utakapoona watu hawajachukulia mchango wako kwa uzito ulioutegmea.

3. Chagua kuwa mshindi wa maisha yako.

-Mafanikio yako yanaweza kuvutia watu, utakapo pata mafanikio jua kwamba utapata marafiki wazuri, wasio wa kweli na maadui wachache. Endelea kuwa mshindi na siku zote chagua kufanya mambo yako kwa uhodari na kuamini utaendelea kufanikiwa licha ya watu kukuvunja moyo au kudharau unachofanya. Kumbuka kila mtu anatamani mafanikio ila wachache kama wewe mwenye kujibidiisha ndio washindi hivyo tegemea kupata watu wasiokupenda kwani ''mti wenye matunda haukosi kupigwa mawe.''

4. Kuwa mtu mkweli na muadilifu.

-Hakuna mtu anayependa kudanganywa, kutapeliwa, kutendwa vibaya kwa namna yeyote ile sidhani hata wewe binafsi kama utapenda ufanyiwe hivyo. Malipo ya uadilifu ni watu kukuamini na kukutegemea katika mambo mbalimbali ya kijamii, kikazi au hata kisiasa, watu watakupenda kwa kuwa unaaminika kwa utashi na umahiri wako hivyo wanaweza kukupatia kazi, kukuomba uwaongoze kwa kukupatia cheo kikubwa nakadhalika. Vizuri zaidi hata familia yako nao watakupenda na kuiga mfano wako.

 

5. Jenga maisha yako kwa kadri uwezavyo.

-Ulichojenga leo kwa muda wa miaka mingi kinaweza bomolewa kwa siku moja na mtu mwingine. Hata hivyo huna sababu kutojenga maisha yako kwasababu ya kuogopa watu wengine, fanya uwezalo kama ni kuboresha nyumba unayoishi, afya yako au kazi inayokupatia kipato kila siku. Usichukulie maisha katika upande mbaya kwa kusema ''hata nikitafuta mali nitaziacha hapahapa duniani'' hiyo ni dhana mbaya kwasababu hata hao waliotengeneza magari tunayotumia leo kusafiria, wataalamu wa  afya wanaotutibu tunapoumwa, wakandarasi wanaojenga majengo tunayotumia kama ofisi kwa kazi mbalimbali laiti nao wasingefanya kazi zao basi leo tusingeweza kurahisisha maisha kama tunavotumia matunda ya kazi zao.

 

6. Fanya mambo mazuri kwa maslahi yako na ya watu wengine.

-Utafanya mazuri lakini baadhi ya watu hawatatosheka na msaada wako, hakuna haja ya kuwajali sana watu wa aina hiyo maana hawataweza kurudhika kwa chochote utakachowafanyia kiwe kidogo au kikubwa. Saidia kufanya mambo mbalimbali ya kimaendeleo katika mji wako kwani hiyo ndiyo namna ya kuonyesha uungwana wako kwao. Usisahau vilevile kufanya kwako mambo ya msingi katika jamii ndio mwanzo wa kupata mengi kwa watu unaowasaidia.

 

7. Jishirikishe na kujitolea kusaidia wengine kwa namna yeyote ile.

-Shirikiana kwa hali na mali na watu wengine, huwezi kuishi mwenyewe hata kama una pesa, mali, chakula na kila kitu unachodhani ukiwanacho utakaa mbali na walimwengu. Dunia ya sasa inajengwa kwa kushirikiana hivyo ukitaka kufanikiwa na maisha yako penda kushirikiana na wenzako na kila kitu utapata kutoka kwa kwao. ''You receive more by giving more.'' amini kila kitu unachotaka kipo kwa watu wengine, ni wewe tu kuwa nao pamoja na kujenga umoja. Huwezi kuwa na kila kitu ila unawezapata vitu utakavyo kwa watu wengine.

 

WORD OF THE DAY: ''Happiness is by ch0ice, not by chance.''

Kama una chochote cha kuongeza kuhusiana na mada hapo juu, tafadhali usisite kutoa maoni yako!